電視節目

因為在朋友的blogspot寫了一大段話，想落是可以同多些人share的，所以抄來又改改，讀過的人可以再讀．

我因為近來在家庭作業(孽)，所以看多了不同時段的電視節目，朋友提起近期值得追的是亞視的｛危險人物｝，而我在追的是下午的｛季節｝和由狄娜主持的｛百年中國｝．

我同屋只要在家都要睇{危險人物}，仲係唔準轉台果隻，結果我都有睇幾個個案．開頭宣傳得最勁的有{八仙飯店}，其後的｛青少年殺人事件｝，{校長殺人}也很有觀看性，我覺最好睇都係{滾油殺夫}，個個演得好似親身經歷咁．演出的人都很落力，可惜亞視的當家花旦來來去去都係果幾個--早上重播劇集演大醫生係佢，下午既婦女節目又見佢，到晚上做有個十幾廿歲女既殺夫兇手都係佢，久不久既籌款節目主持都係佢....你都咪話係亞視冇發揮機會，但至於呢位咁八面玲瓏的演員，我至今還是記不起她名字!!

至於翁靜晶作為一個主持，講解案情都好精境，佢以前寫過本'律師藤'我都有睇，OK唔錯，講不同個案，都學到野，可以一睇．相信如果冇翁小姐果隻面不改容既開場白同結尾，呢個劇集就稍嫌過於搧情了．但最好笑都係每集結尾會有條有奬問題，試過幾次，問做主角果個係邊位演員....唉，你話點算?!!

｛季節｝在每天的下午2:15播出，連埋廣告都只係25分鐘，但因為以前是在歡樂今宵內播，所以剪輯得好緊湊，咁家常又咁到肉的劇情，而且鋪排得很暢順，是現在無綫唔再有的精品，而且擔戲的都是老戲骨，當時年輕稚嫩的，現在都是獨當一面的演員了．我每天就是很忙，都必定到時到候睇．如果有全套精裝版，我都會買來珍藏．

有發現無綫亞視近排同時都有製作講述中國百年史的節目，無綫的是｛百年中國｝亞視的叫｛細說百年｝，無綫在包裝方面應記一功，因為大家的注意力都落在久未見報但仍風韻尤存的狄娜身上．一代奇女子果然具吸引，她現在説話雖不及過去主持蒙太奇時那般暢順流俐，但仍然是那個腔口那個語調則邊個都學唔到．見她身材四肢就連手指都咁賞心悅目時，國家歷史在她的淡淡但有力的話語間都成了輕舟．最具觀看性的還是她每次都會加入個人觀點，說古諭今，句句都成當頭棒呢．